மத்திய அரசு வழக்கறிஞர் நியமனத்தில் புதிய விதிகள்!

மத்திய அரசு சார்பில் உச்ச நீதிமன்றம், உயர் நீதிமன்றங்கள், மாவட்ட மற்றும் துணை நீதிமன்றங்கள், தீர்ப்பாயங்கள் உள்ளிட்ட நீதித்துறை அமைப்புகளில் வழக்குகளை நடத்தும் வழக்கறிஞர்கள் நியமனம் தொடர்பான புதிய வழிகாட்டுதல்களை மத்திய சட்டத்துறை வெளியிட்டுள்ளது.
மத்திய அரசு வழக்கறிஞர் பதவிக்கு விண்ணப்பிப்பவர்கள் அங்கீகரிக்கப்பட்ட சட்டப் பல்கலைக்கழகம் அல்லது சட்டக் கல்லூரியில் பட்டம் பெற்றிருப்பதுடன், மாநில பார் கவுன்சிலில் பதிவு செய்து, அகில இந்திய வழக்கறிஞர்கள் தேர்வில் தேர்ச்சி பெற்றிருக்க வேண்டும் என புதிய விதிமுறைகள் குறிப்பிடுகின்றன.
விண்ணப்பதாரர்களின் சட்டப் பயிற்சி அனுபவம், வழக்குகளை கையாளும் திறன், நடத்தை, நேர்மை மற்றும் ஒட்டுமொத்த செயல்திறன் ஆகியவை பரிசீலிக்கப்பட்டு, தேர்வு செய்யப்படுபவர்களின் செயல்திறன் ஆண்டுதோறும் மதிப்பாய்வு செய்யப்படும் என தெரிவிக்கப்பட்டுள்ளது.

புதிய வழிகாட்டுதல்களின் முக்கிய அம்சங்கள்

மத்திய சட்டத்துறை, மத்திய அரசு வழக்கறிஞர்கள், பார் கவுன்சில், உச்ச நீதிமன்றம் மற்றும் உயர் நீதிமன்றங்கள்
வழக்கறிஞர் நியமனத்துக்கு தகுதி விதிகள், அனுபவ அடிப்படையிலான பரிசீலனை, ஆண்டுதோறும் செயல்திறன் மதிப்பீடு, தேவையெனில் பட்டியலில் இருந்து நீக்கம்
சட்டப் பட்டம் மற்றும் பார் கவுன்சில் பதிவு, அகில இந்திய வழக்கறிஞர்கள் தேர்வில் தேர்ச்சி, குற்றத் தண்டனை மற்றும் தொழில்முறைத் தடையின்மை
வருமான வரி, சுங்கம், ஜிஎஸ்டி, பிஎம்எல்ஏ உள்ளிட்ட சிறப்பு சட்ட அனுபவத்துக்கு முக்கியத்துவம், ஆவண உண்மைத்தன்மை சரிபார்ப்பு, ரகசியத்தன்மை பாதுகாப்பு

புதிய வழிகாட்டுதலின்படி, மத்திய அரசு வழக்கறிஞர் பதவிக்கு விண்ணப்பிப்பவர்கள் இந்திய பார் கவுன்சிலால் அங்கீகரிக்கப்பட்ட சட்டப் பல்கலைக்கழகம் அல்லது சட்டக் கல்லூரியில் இளங்கலை சட்டப் பட்டம் பெற்றிருக்க வேண்டும். 1961-ம் ஆண்டு வழக்கறிஞர்கள் சட்டத்தின் அடிப்படையில் மாநில பார் கவுன்சிலில் பதிவு செய்திருக்க வேண்டும். மேலும், அகில இந்திய வழக்கறிஞர்கள் தேர்வில் தேர்ச்சி பெற்று பயிற்சி சான்றிதழ் பெற்றிருப்பதும் அவசியம் என தெரிவிக்கப்பட்டுள்ளது.

வழக்கறிஞர்களின் சட்டப் பயிற்சி அனுபவத்தின் அடிப்படையில் அவர்கள் மத்திய அரசு வழக்கறிஞர்கள் குழுவில் சேர்க்கப்படுவதற்குப் பரிசீலிக்கப்படுவார்கள். அவர்கள் இதுவரை கையாண்ட வழக்குகளின் தன்மை, முக்கியத்துவம் வாய்ந்த வழக்குகளை கையாள்வதில் வெளிப்படுத்திய திறன் உள்ளிட்ட அம்சங்கள் மதிப்பீட்டில் இடம்பெறும்.

வருமான வரி, சுங்கம், ஜிஎஸ்டி, பணமோசடி தடுப்புச் சட்டம் உள்ளிட்ட சிறப்பு சட்டங்களில் அனுபவம் பெற்ற வழக்கறிஞர்கள், நீதிமன்றங்கள், தீர்ப்பாயங்கள் மற்றும் நீதித்துறை சார்ந்த மன்றங்களில் மத்திய அரசின் சிறப்புக் குழுக்களுக்காக பரிசீலிக்கப்படுவார்கள். குறைந்தது 10 ஆண்டுகள் சட்டப் பணி முன் அனுபவம் உள்ளவர்களும் அவர்களின் சட்டத் திறனை அடிப்படையாகக் கொண்டு குழுவில் சேர்க்கப்படுவதற்கு பரிசீலிக்கப்படுவார்கள்.

தேர்வு செயல்முறையில் வழக்கறிஞரின் ஒட்டுமொத்த செயல்திறன் பதிவு, நடத்தை மற்றும் நேர்மை ஆகியவை கணக்கில் கொள்ளப்படும். விண்ணப்பங்களில் குறிப்பிடப்பட்டுள்ள தகவல்கள் மற்றும் சமர்ப்பிக்கப்படும் ஆவணங்களின் உண்மைத்தன்மையும் அதிகாரிகளால் சரிபார்க்கப்படும்.

மேலும், எந்த குற்ற வழக்கிலும் தண்டிக்கப்படவில்லை என்றும், பார் கவுன்சில் அல்லது தகுதியான அதிகாரியால் வழக்கறிஞர் தொழில் செய்வதற்கு தடை விதிக்கப்படவில்லை என்றும் விண்ணப்பதாரர்கள் தெரிவிக்க வேண்டும். மத்திய அரசின் நலன்களுக்கு பாதிப்பு ஏற்படுத்தும் வகையில் வழக்கறிஞர் பதவியை பயன்படுத்தியிருப்பது கண்டறியப்பட்டால், விண்ணப்பம் நிராகரிக்கப்படும்.

மத்திய அரசு வழக்கறிஞர்களின் செயல்திறன் ஆண்டுதோறும் மதிப்பாய்வு செய்யப்படும். நீதிமன்ற அவமதிப்பு, தொழில்முறை ஒழுங்கீனம் அல்லது நீதிமன்றத்தால் தண்டனை பெற்றது போன்ற காரணங்களின் அடிப்படையில், மத்திய அரசு எந்த நேரத்திலும் வழக்கறிஞரை பட்டியலில் இருந்து நீக்க முடியும் என வழிகாட்டுதல்களில் கூறப்பட்டுள்ளது.

மத்திய அரசு வழக்கறிஞர் குழுவில் இடம்பெறுபவர்கள் தங்களுக்கு ஒதுக்கப்படும் அமைச்சகம், துறை அல்லது நிறுவனங்கள் தொடர்பான தகவல்களின் ரகசியத்தன்மையை பாதுகாக்க வேண்டும் என்றும், புதிய வழிகாட்டுதல்கள் உடனடியாக அமலுக்கு வருவதாகவும் மத்திய சட்டத்துறை தெரிவித்துள்ளது.