தைப்பூசம், வார விடுமுறை கூடுதல் பேருந்துகள், சிறப்பு ரயில்கள் அறிவிப்பு

தைப்பூசம் விழா மற்றும் வார இறுதி நாட்களை முன்னிட்டு, பயணிகள் நெரிசலை சமாளிக்கும் வகையில் வெள்ளி மற்றும் சனிக்கிழமைகளில் மொத்தம் 1,005 சிறப்பு பேருந்துகள் இயக்கப்பட உள்ளதாக போக்குவரத்துத் துறை அறிவித்துள்ளது.

இதுகுறித்து, அரசு விரைவுப் போக்குவரத்துக் கழகத்தின் மேலாண் இயக்குநர் மோகன் வெளியிட்டுள்ள அறிக்கையில், ஜனவரி 30 (வெள்ளி), 31 (சனி) மற்றும் பிப்ரவரி 1 (ஞாயிறு) ஆகிய நாட்களில் தைப்பூசம் மற்றும் வார விடுமுறையையொட்டி, சென்னை மற்றும் பிற முக்கிய நகரங்களில் இருந்து தமிழகம் முழுவதும் அதிகளவில் பயணிகள் பயணம் மேற்கொள்ள வாய்ப்புள்ளதாக தெரிவிக்கப்பட்டுள்ளது.

இதனை கருத்தில் கொண்டு, வழக்கமாக இயக்கப்படும் பேருந்துகளுடன் கூடுதலாக சிறப்பு பேருந்துகள் இயக்க திட்டமிடப்பட்டுள்ளது.

சென்னையிலிருந்து சிறப்பு பேருந்துகள்

கிளாம்பாக்கம் பேருந்து நிலையத்திலிருந்து
திருவண்ணாமலை, திருச்சி, கும்பகோணம், மதுரை, திருநெல்வேலி, நாகர்கோவில், கன்னியாகுமரி, தூத்துக்குடி, கோயம்புத்தூர், சேலம், ஈரோடு, திருப்பூர் ஆகிய இடங்களுக்கு
- ஜன.30: 360 பேருந்துகள்
- ஜன.31: 485 பேருந்துகள்
கோயம்பேடு பேருந்து நிலையத்திலிருந்து
திருவண்ணாமலை, நாகை, வேளாங்கண்ணி, ஓசூர், பெங்களூரு ஆகிய இடங்களுக்கு
- வெள்ளி: 60 பேருந்துகள்
- சனி: 60 பேருந்துகள்
மாதவரம் பேருந்து நிலையத்திலிருந்து
- வெள்ளி: 20 பேருந்துகள்
- சனி: 20 பேருந்துகள்

மற்ற மாநில, நகரங்களில் இருந்து

பெங்களூரு, திருப்பூர், ஈரோடு, கோயம்புத்தூர் உள்ளிட்ட இடங்களில் இருந்து தமிழ்நாட்டின் பல பகுதிகளுக்கு 200 சிறப்பு பேருந்துகள் இயக்கப்படும்.
ஞாயிற்றுக்கிழமை பயணிகள் சென்னை மற்றும் பெங்களூரு திரும்ப வசதியாக, தேவைக்கேற்ப அனைத்து இடங்களிலிருந்தும் சிறப்பு பேருந்துகள் இயக்கப்படும்.

முன்பதிவு நிலவரம்

வெள்ளிக்கிழமை: 4,132 பேர்
சனிக்கிழமை: 4,175 பேர்
ஞாயிற்றுக்கிழமை: 8,256 பேர்
முன்பதிவு செய்து பயணம் செய்ய திட்டமிட்டுள்ளதாக தெரிவிக்கப்பட்டுள்ளது.

தைப்பூசம் விழாவை முன்னிட்டு பழனிக்கு சிறப்பு ரயில்கள்

தைப்பூசம் விழாவையொட்டி, மதுரை சந்திப்பு – பழனி இடையே முன்பதிவு செய்யப்படாத விரைவு சிறப்பு ரயில்கள் இயக்கப்படுவதாக தெற்கு ரயில்வே அறிவித்துள்ளது.