திருப்பரங்குன்றம் மலை உச்சியில் தீபமேற்ற உயர்நீதிமன்ற அனுமதி

திருப்பரங்குன்றம் மலையின் உச்சியில் உள்ள தீபத்தூணில் தீபம் ஏற்ற அனுமதி வழங்கிய சென்னை உயர்நீதிமன்ற மதுரை அமர்வு இரு நீதிபதிகள் அமர்வின் உத்தரவு மூலம் முருக பக்தர்களுக்கு நீதி கிடைத்துள்ளதாக பியூஷ் கோயல் தெரிவித்தார்.

தில்லியில் உள்ள பாஜக தலைமையகம்-இல் செய்தியாளர்களைச் சந்தித்த அவர், முருகப்பெருமான் வீற்றிருக்கும் திருப்பரங்குன்றம் மலையில் தீபம் ஏற்றுவது ஒரு பழங்கால வழக்கம் என்றும், அது பல நூற்றாண்டுகளாகத் தொடர்ந்து வரும் மரபு என்றும் நீதிமன்றம் திட்டவட்டமாக உறுதிப்படுத்தியுள்ளதாக கூறினார். இது ஹிந்து மதம் மற்றும் உள்ளூர் மக்களின் உணர்வுகளுடன் தொடர்புடைய விஷயம் என்றும் அவர் குறிப்பிட்டார்.

இந்த உத்தரவு, தமிழகத்தில் ஆட்சி செய்து வரும் திமுக அரசு, முதல்வர் மு.க. ஸ்டாலின், துணை முதல்வர் உதயநிதி ஸ்டாலின், காங்கிரஸ் மற்றும் இண்டி கூட்டணிக் கட்சிகளின் நிலைப்பாட்டை அம்பலப்படுத்துவதாகவும் பியூஷ் கோயல் விமர்சித்தார்.

ஹிந்துக்களுக்கு எதிரான கருத்துகளை திமுக, காங்கிரஸ் மற்றும் அதன் கூட்டணிக் கட்சித் தலைவர்கள் முன்வைத்து வருவதாகக் கூறிய அவர், பாஜக எப்போதும் தேசத்தின் மதச்சார்பின்மைத் தன்மையைப் பேணிக்காக்கவும், திருப்திப்படுத்தும் அரசியலுக்கு எதிராகவும் செயல்படும் என்றார். ஜாதி மற்றும் மதத்தின் அடிப்படையில் மக்களைப் பிளவுபடுத்தும் எந்த முயற்சியையும் பாஜக பொறுத்துக்கொள்ளாது என்றும் அவர் வலியுறுத்தினார்.

சமீபத்திய பிகார் தேர்தலும், மகாராஷ்டிர உள்ளாட்சித் தேர்தல்களிலும் தேசிய ஜனநாயகக் கூட்டணி பெரும் வெற்றி பெற்றதாகக் குறிப்பிட்ட பியூஷ் கோயல், தென் மாநில மக்களும் திமுக மற்றும் அதன் கூட்டணிக் கட்சிகளுக்கு உரிய பதிலடி வழங்குவார்கள் என்றார்.

மத்திய அமைச்சர் கிஷண் ரெட்டி:
மத்திய நிலக்கரி மற்றும் சுரங்கத் துறை அமைச்சர் கிஷண் ரெட்டி தனது எக்ஸ் (X) பதிவில், சென்னை உயர்நீதிமன்ற மதுரை அமர்வின் தீர்ப்பு, தமிழ்நாட்டில் காங்கிரஸ்–திமுக கூட்டணியின் சநாதன தர்ம எதிர்ப்பு நிலைப்பாட்டையும், சிறுபான்மையினரைத் திருப்திப்படுத்த எந்த எல்லைக்கும் செல்லும் போக்கையும் ஒரே நேரத்தில் வெளிச்சம் போட்டுள்ளதாக கூறினார். அந்தக் கூட்டணியை மக்கள் கடுமையாகத் தண்டிப்பார்கள் என்றும் தெரிவித்தார்.

மத்திய இணை அமைச்சர் எல். முருகன்:
எல். முருகன் கூறுகையில், உயர்நீதிமன்ற மதுரை அமர்வின் தீர்ப்பு, தமிழக அரசு மற்றும் அறநிலையத் துறையின் செயல்பாடுகளை கேள்விக்குள்ளாக்குவதாக அமைந்துள்ளது என்றார். இனி ஆண்டுதோறும் கார்த்திகை தீப நாளன்று தீபத்தூணில் தீபம் ஏற்ற வேண்டும் என்ற நீதிமன்ற உத்தரவை திமுக அரசு கட்டாயம் பின்பற்ற வேண்டும் என வலியுறுத்தினார்.

தமிழக பாஜக தலைவர் நயினார் நாகேந்திரன்:
நயினார் நாகேந்திரன் கூறுகையில், இந்த தீர்ப்பிற்குப் பிறகும் மேல்முறையீடு செய்வோம் என திமுக அரசு அறிவித்திருப்பது அதன் தமிழர் பண்பாட்டு விரோதப் போக்கை வெளிப்படுத்துகிறது என்றார். தீபத்தூணில் தீபமேற்றும் நாளும், திமுக அரசு தமிழகத்திலிருந்து அகற்றப்படும் நாளும் தொலைவில் இல்லை எனவும் விமர்சித்தார்.

தமாகா தலைவர் ஜி.கே. வாசன்:
ஜி.கே. வாசன் தெரிவித்ததாவது, திருப்பரங்குன்றம் மலை உச்சியில் உள்ள தீபத்தூணில் தீபம் ஏற்றலாம் என்று உயர்நீதிமன்ற மதுரை அமர்வு உத்தரவிட்டிருப்பது வரவேற்கத்தக்கது. சட்டம்–ஒழுங்கு பிரச்னை இல்லாத நிலையில், அதுபற்றி மக்கள் மத்தியில் தேவையற்ற அச்சத்தை அரசு ஏற்படுத்தியிருக்கக் கூடாது என்பதற்கு இது எடுத்துக்காட்டான தீர்ப்பு என்றார்.